早前放左呢張相上網好個朋友見到我....前面幾舊三文魚腩都勁比LIKE, 以為我去左咩高級日本料理, 我講比佢地聽係食放題, 好多人都問邊間放題D刺身咁正, 所以我懶得個個覆MSG, 直頭寫篇食評比大家, 一次介紹晒唔好再私下問我啦~HAHAAA
$288一個人任食任飲2小時, 汽水啤酒係任飲, 有6款點菜紙可以任點任食
雖則係任食但食得放題都唔好浪費食物啦
餐廳地方好闊落, 好乾淨, 2個人可以坐大大張卡位, 好舒服.
食日本放題喪食刺身是常識吧, 2個人先來一大盤雜棉刺身, 一睇重量級呢盤刺身出場, 如果係係出面D日本餐廳叫至少都4-500蚊囉...哈...所以就算真係未食, 望到都己經好興奮
食落更加<無.得.頂.>.....超有驚喜啊, 全部刺身都非常新鮮, 牡丹蝦好大隻, 甜蝦好鮮甜, 但最最~最正係我最愛的三文魚刺身, 竟然全部都係腩位, 太好食啦, 好好新鮮, 好好好~肥美啊!!!
我有唸過會唔會只係自己好彩, 但我望下前面同後面張枱, 其他食客上D刺身係一樣咁新鮮, 全部都係上三文魚腩, 真係無呃你, 厚切三文魚腩, 特別有口感, 非常好味呢!!
之後再來點幾款壽司, 見到朵花之戀都係用上三文魚腩, 太精彩啦吧!! 火炙系列壽司配上蔥花, 壽司飯軟硬度適中, 口感非常之好.
我未見過放題有得食壽司丼, 雖然好飽肚但二色丼係三文魚配香蔥吞拿魚蓉, 忍唔住都要叫一客, 份量亦一d都唔細, 如果女仔想試, 我唸可以叫佢小飯~哈
今餐的第二驚喜係海膽手卷任食.........海膽好新鮮, 完全無腥味, 入口即溶, 好香好滑, 食埋佢今次真係絕對回本囉.
除左刺身, 放題'當中亦包括好多熱盤及其他串物, 小食等, 當中鹽燒甘魚頭食落好甘香, 燒得剛剛好, 唔會太硬, 魚頭亦有好多魚肉部份可以食到
超大條多春魚, 入面好多春啊, 正
芝麻雞亦好入味, 雞亦面上加左芝麻, 味道即時香好多
好大份燒牛肋骨, 燒到6成熟, 粉紅色既牛肉係最理想, 肉質好鮮嫩, 肉質好好味, 吱少少檸檬汁再點沙律醬一齊食仲正
另外香橙焗銀雪魚, 講明每台數量有限, 要點就快手, 上枱時成隻碟都仲係好熱, 證明真係即叫即焗, 顏色好靚, 銀雪魚配香橙汁原來咁開胃, 醬汁酸酸甜甜同銀雪魚好夾
最後一個驚喜就係蒲燒鰻魚, 先唔講味道, 我當初仲以為1條係1小舊, 等我地仲叫左2份, 點知上碟, 真係眼都突埋, 一條係足足長過我成隻手掌, 太誇張啦. 味道亦十分不錯, 鰻魚無骨, 燒汁亦好惹味, 如果唔係咁飽, 配埋個白飯真係一流.
今次經驗打破晒我食放題既錯覺, 成日以為食放題得個量, 質數多數麻麻地, 但估唔到呢間餐廳真係做到平靚正 + 非常有質素的日本放題, 真心推介比大家, 提提大家如果想試, 星期五六一定要訂枱啊
響葫蘆 燒物 . 居酒屋
尖沙咀亞士厘道17-19號4樓
歡迎邀稿或產品試用，電郵聯絡:
ppqq1437@yahoo.com.hk
Facebook FansPage: www.facebook.com/1437ritaandhim
其他BLOG分享包括blogspot, Weshare, sheblog,
theZtyle, beautyexchange, blogselle, mamibuy,
classesweplay, esdlife, ublog, QOOZA, iTrial,
openrice...等
沒有留言:
張貼留言