啖啖蟹肉撈飯 @銅鑼灣爆人氣-奈良上釜

之前經過登龍街見到奈良上釜經常排隊排好長，有次八掛問問門口個姐姐話原來有得訂位，於是我地預早一個星期訂位，真係好彩有訂位因為我地到左門口依然好多人，講明呢期銅鑼灣爆人氣餐廳，如果無訂位真係唔知排幾耐！坐低左待應都好有禮貌咁放低熱茶同介紹餐牌上面既食物~

餐牌上有釜飯又有喬麥麵盛，係銅鑼灣區來講價錢都算合理，最近仲做緊推廣，有蟹盛同母親父親節期間限定既櫻海老蜆肉釜飯！我地覺得其他都可以遲d再試，期間限定當然要試下新野啦！於是每人各自揀左一個期間限定去試喇！

套餐會分開兩次送上，首先上左餐前小食先，蟹宴分別有松葉蟹腳天婦羅、松葉蟹腳(熟)，兩種食法，兩種口感。

蟹腳真係好鮮甜，而且啖啖肉，感覺非常滿足！

另一個套餐就跟雜錦天婦羅同櫻花饅頭，雜錦天婦羅有南瓜、蕃薯、紅蘿蔔等等~都係剛炸起好新鮮！

 櫻花饅頭入要包住鰻魚，食落似糯米飯黏黏地既感覺好煙韌，口感一流！

終於等到釜飯黎喇！有麵豉湯、蟹鉗蒸蛋、松葉蟹釜飯、哈蜜瓜！嘩~ 成個蟹蓋係個飯上面，好精彩呢!!!

蒸蛋入面有一大舊蟹鉗，啖啖肉，配埋蒸蛋一齊食，真係非常鮮甜！

開始食主角喇！將釜飯裡面既蟹肉同蟹膏撈埋，最底仲要有飯焦架！怪不得有日本煲仔飯之稱啦！蟹肉份量真係有好多，撈埋一齊食啖啖都食到蟹肉的鮮甜，好滿足....真係超超超正，幸福感爆標啊!!!

 櫻花蝦蜆肉釜飯賣相都唔錯！一樣有麵豉湯同甜品蕃薯蛋糕，呢個蜆肉飯一樣都係好足料，一個釜飯份量都好多，起碼有兩碗飯！蕃薯蛋糕口感似啖啖蕃薯咁，亦唔太甜！不過個人還鐘意食啖啖蟹肉撈飯，真係好精彩。

成餐整體感覺好好，不論環境、食物同服務都好好，排長龍同爆人氣果然係有原因的，下次一定會再同朋友試埋其他既食物！

www.facebook.com/1437ritaandhim
歡迎大家給予意見，如有任何邀稿或產品試用，請電郵聯絡: ppqq1437@yahoo.com.hk，我的其他15個BLOG分享包括: Instagram, Blogspot, BeautyExchange, Oh爸媽、24partent專家博客, Weshare, she.com, theZtyle, ELLE.com, style-tips,  U Blog, iTrial, Esdlife靚太club, QOOZA, Mybb.com,  ClassesWePlay星級blogger, Mamibuy駐站部落客, OpenRice(級別5)