2016年6月5日 星期日

超邪惡肥仔餐~ 芝士溶岩炸雞 (我食過最好味的炸雞)

星星雖然帶起左啤酒炸雞熱潮, 但獲好評既炸雞店好似唔多, 不過近日朋友間講起銅鑼灣有一間韓式炸雞店, 個個食完都讚不絕口, 出名鐘意食熱氣野既我, HAPPY FRIDAY就同老公一齊去試試啦。
一坐低仲研究緊個MENU時, 店員己經推介最新推出既三重芝士炸雞 $198 嘩~ 我呢個芝士控聽到點忍得住呢, 就呢個啦!! ^^ 食物未上先來飲品, 飲品一上枱真係打左個突, 叫左個菊花蜜特飲 $58, Woooow.....湯碗咁大杯, 好好~~好誇張呢!! 但我就比較鐘意後面個杯HITE RITA $78, 韓國HITE BEER我鐘意佢易入口, 但呢款 HITE RITA, 除左鐘意佢同我同名外~哈哈, 另外就鐘意佢加左D 檸檬特飲係杯底, 一路飲除左有啤酒香仲有檸檬酸甜味, 好正, 好飲, 女士們一定鐘意!!!!
主菜上場啦~ 三重芝士炸雞, 用上新鮮焗起的大面包內裝滿濃濃的芝士醬, 未食己經聞到超濃烈的芝士香, 一大盤有8大舊雞件, 鐵盤最底部有少少芝士汁做底, 再曬上少少香草, 見到賣相己經流晒口水 ^^
 餐廳超細心每張枱上面都會提供手套, 用手食雞時唔洗擔心整污糟對手, 另外會提供一個小盤, 比你食完將雞骨等垃圾掉入去, 乾淨又衛生既做法.值得比個讚!
食啦喂~ 將一舊炸雞點入去滿滿的芝士醬內, 將半舊雞浸入芝士醬後再拉起.....OMG!!!!! 見到都興奮既芝士絲.....好濃郁的芝士醬, 太精彩啦!
當我一心以為炸雞係同肯X雞個D差不多既時候, 第一口咬落去, 炸雞外皮非常香脆, 但無肥膏, 完全唔會有肥淋淋既感覺, 雞肉亦非常嫩滑, 好多肉汁, 再配埋芝士醬, 真係好好味, 好驚喜啊!!!!!
太好食~ 真係食到停唔到口, 我平時食炸雞怕肥, 雞皮我全部都唔會食, 但呢度因為唔油膩, 雞皮炸到好香脆, 反而一定要連皮食, 芝士醬食完一口再一口, 己經唔記得左個 < 肥 > 字點寫, 可能我真係太鐘意食芝士, 真心覺得真係超好味啦, 我同老公直頭爭住食, 容許我誇張少少講句 "真係我係香港食過最好食既炸雞。"
最後炸雞比我地清晒, 面包入面仲有唔少芝士醬, 其實係可以成個包食埋佢, 因為面包焗到好香脆, 點埋D芝士醬一齊食, 太滿足~太邪惡啦!!!!!
 炸雞味道真係好濃郁, 好味係好味, 不過食得多都會有少少溜, 所以另一主菜我同老公決定點反個魚肉串鍋, 清清地, 講真真係好清, 但當食番D菜, 菇, 豆腐, 豚肉, 韓式魚片串等, 中和番頭先D芝士味都算不錯啦。
其實呢度仲有好多唔同口味既炸雞或者焗雞, 但我地2個人實在食唔到太多, 唯有下次再試其他啦~ ^^

SODAM CHICKEN
銅鑼灣耀華街3號百樂中心7樓


www.facebook.com/1437ritaandhim
歡迎邀稿或產品試用,電郵聯絡: ppqq1437@yahoo.com.hk 
其他BLOG分享包括: 

沒有留言:

張貼留言