無電話無IPAD...小朋友7年來玩乜?

上一篇提及到小周董7年來除左用ZOOM上堂同做功課外，倆兄弟都好少用電子產品的習慣，收到好多朋友PM問...無電話無IPAD小朋友7年來玩乜? 首先唔可以一刀切講電子產品係一件教壞小朋友的東西，始終年代進步電子產品有時真係可以令到小朋友加快某種學習，而我當初唔想佢地接觸太多的原因，只係想培養佢地閱讀的興趣，小朋友少睇畫面豐富的電子產品，的確會較難有動力拎起本書，所以大小周董由細到大對閱讀都唔抗拒，哥哥亦對文字特別有興趣，好多時會主動學習一D中/英文生字。 

平時除左睇書，生活上另一主要興趣就係畫畫，暫時大小周董都未有一d天生的創作力，所以好多時都係COPY一D書的封面或者....亂畫，有時真下顏色佢地都會好開心 ^^''

因為疫情多左時間係屋企，但意外收獲係....哥哥會想主動學一D新野，例如想整下野食什至想學織冷頸巾，雖然好似有D女性化，但小朋友有呢個心我都會盡量配合..... 有時什至一齊學一齊試一齊撞板，我覺得都會係一個幾好笑的回憶 ^^

另外我覺得不論男仔定女仔，都要有自理能力，或多或者都比佢地試下幫忙做下家務，細佬3歲做一D簡單家務例如拎下衫架，將窗簾釣除下，哥哥就掃下地，有時洗下米或者教佢煮下一D簡單餸 ((蕃茄炒蛋)) 佢地唔會覺得係苦工.....仲好開心可以幫手添 ^^

不過我都明始終比部IPAD可以還自己一個ME TIME，如果堅持無電子產品，大人就要有心理準備........小朋友創意無限，當佢自己唸有咩玩的時候，有時都會嚇你一跳，例如拎個膠袋當帽、或者自己用紙剪左隻拖鞋出來等等 ^^

大小周董都係正常的小朋友，對電子產品都有一種渴望，點解我會知? 因為當我見到佢倆兄弟可以用2個舊電話套.....或者拎個紙盒出來扮傾電話、扮SEND MSG仲有扮打機，有時足足可以扮成個鐘.....哈哈!! 另外，出去食飯時佢地見到隔離枱小朋友每人一部電話或IPAD，細佬竟然拎左本餐牌扮打字....我就知佢地內心都會有一種渴望，所以正如我頭先所講.....未必需要一刀切完全唔比小朋友用電子產品，尤其哥哥上左小學真係好難完全唔用，但適當地使用同埋控制使用時間才是家長需要注要的地方，我知佢地都會有呢個好奇心.......但暫時佢地未去到好大渴求，所以我就堅持住先 ^^

不過在7年間我自己個人經驗，佢地少用電子產品除左可以令到小朋友加強閱讀興趣，小朋友更加可以發揮多D小宇宙搵多D不同嗜好及娛樂，而有兄弟姐妹的話佢地關係都會比較親密，好似大小周董倆兄弟佢地會有更多時間相處，一齊玩一齊睇書做乜都一齊，所以佢地感情真係好好。

雖然我呢份堅持可能有人覺得好變態好無謂，話我同時代脫節，而的確我因為咁而少左好多私人時間，但我知佢地越大就必需跟隨時代步伐走，使用電腦始終方便好多亦無可能唔用同唔識，但暫時佢地仲細，有一個方法可以令佢地喜歡閱讀，而亦可以同時加深我地一家人的親子關係，所以我都覺得係<得>多過<失>呢。^^

大家如果都想同我分享你的經歷，歡迎加我FACEBOOK同IG，INBOX同我開心SHARE啊 ^^

FB: 小周董世界
IG: 1437rita

https://www.facebook.com/1437ritaandhim
歡迎大家給予意見，如有任何邀稿或產品試用，請電郵聯絡: ppqq1437@yahoo.com.hk，我的BLOG平台分享包括: Instagram, Blogspot, BeautyExchange, Oh爸媽、24partent專家博客, 親子國王BabyKingdom親子KOL,  Weshare, she.com, theZtyle,   U Blog, Esdlife靚太club, QOOZA, Mybb.com,  ClassesWePlay星級blogger, Mamibuy駐站部落客, OpenRice(級別4)