開心分享 (歡迎電郵比比意見) ^^

小周董世界

香港寸金尺土，好多餐廳其實都只係得小量玩意比小朋友玩就稱自己為親子餐廳，唔係朋友介紹都唔知香港竟然有一間咁大間，咁多野玩既親子餐廳，當中最吸引小朋友都係呢幾個吹氣滑梯，夏天差不多完，涼涼地未必去到海灘? 但呢度有個吹氣滑梯會變身成水池，小朋友由成層樓高的滑梯滑落黎，都幾刺激架，不過如果想玩記得帶泳衣同毛巾啦。

如果唔想濕身，除左最高那個吹氣滑梯，其他設施都足以令小朋友玩到(或熱到)變濕水鴨，好似呢個彈彈床好多小朋友都玩到顛晒。

餐廳位於科學園，入到去成個環境都好清靜，而整個餐廳都被池畔包圍，風景真係好靚。

餐廳大部份地方都用左落地玻璃，光線非常充足，成個感覺好舒服。

最重要係大人可以係餐廳嘆住冷氣用餐，小朋友自己係出面玩都可以睇得清清楚楚。餐廳內所有玩樂設施全部都係免費提供比食客，基本上一進入餐廳﹐職員就會為小朋友帶上手帶，小朋友可以無限次任玩所有遊樂設施。

除左吹水彈床同滑梯，仲有好幾款游樂設施，小朋友上上落落不停消耗體力。

小周董來來回回自己爬上爬落，玩左至少10次都唔厭~ 哈

香港地唔係好多公園有得玩鞦韆，呢度有3個鞦韆比小朋友任玩，仲可以望住個湖玩，真係寧捨玩得開心，連我都好想玩埋一份呢。

如果同細DD既小朋友來玩，亦有相對短D的滑梯可以玩，同埋可以坐下呢架飛機影下相, 都好靚呢 ^^

仲有好多架不同款式既車仔比小朋友周圍玩。

小朋友特別鐘意玩水，呢個小水池玩具都好受小朋友歡迎呢。

玩到熱晒+濕晒，返餐廳食野之餘，餐廳入面亦都有大量遊戲比小朋友玩。

除左可以坐船扮海盜、亦可以玩煮飯仔扮下廚師。

仲有大量圖書同小玩具提供比小朋友。成間餐廳基本上都係為小朋友而設，但最可惜係WEEKEND佢無KIDS MENU提供, 而且食物都屬於較高價格，如果以大人計每位$3-400應該都走唔甩了，但食物質素我覺得都好味, 唔會令我地失望, 加上我地由12PM坐到5:30PM....哈哈, 坐足差不多6個鐘都無比人趕的感覺, 所以我覺得都值得推介比大家呢 ^^

食完玩完，可以順便參觀下科學園，個度有好多活動係教導小朋友一D科學知識，同埋一家人可以周圍影下相留念，開開心心又過左一個愉快的周末啦，WEEKEND FAMILY DAY大家都可以搵一日去呢度體驗下啦 ^^

Meraviglia Bar e Ristorante
沙田白石角香港科學園第二期科技大道西10號浚湖樓地下S041號舖