2016年7月11日 星期一

大驚喜~ 明太子料理原來咁好味架

舊朋友相聚佢揀左去食明太子料理, 我以前只係食過明太子飯團, 對明太子可以講係完全唔熟悉, 不過因為唔好意思拒絕朋友, 所以抱住對今餐無乜期望, 一心唸住只係食2個明太子飯團, 純粹為左見下面傾計就算。
餐廳地點好易搵, 銅鑼灣MTR一出轉左行2分鐘就己經見到幢商業大廈... 嘻, 餐廳名好特別, 餐廳裝修好簡約, 紅色椅子配木枱, 簡單得黎好舒服!!
望望餐牌原來有好多選擇, 但我都唔識點菜, 食物就由朋友發板, 我就揀飲品啦。 嘩~ 一眼就望到 $58 任選3款SAKE, 好抵啊!!! 岩晒我呢D貪心之人, 每款SAKE送上枱時仲會好細心, 附上一張細卡紙, 介紹每款日本清酒既特色, 同埋配乜野食物係最夾, 太細心啦!!
其中一款酒佢話同呢個牛油果吞拿魚刺身沙律好夾, 係咪好夾我唔識分, 但呢個沙律少少辣辣地, 吞拿魚刺身好新鮮, 配埋牛油果口感非常好之外, 辣辣地仲好開胃, 份量唔係好多, 做前菜就岩晒喇。
餐牌寫上專業廚師精心泡製, 一級推介, 所以我點左今餐唯一的一款食物就係呢碟醬燒銀鱈魚, 果然無令我失望, 銀鱈魚煎得好香, 皮脆肉嫩, 咬落口仲食到銀鱈魚獨有既魚油香, 吱少少檸檬汁更加惹味, 唯獨我覺得如果有埋沙律醬就會更好啦, 不過可能咁食法會港式D, 哈 ^^
今晚的主菜來啦~ 明太子刺身2食, 有明太子刺身 及 燒明太子, 我忍唔住問下店員明太子其實係乜東東, 先知原來明太子係鱈魚的卵子, 哦....唔怪得餐廳名叫鱈卵屋啦!! HAHAAA...SORRY請見諒我見識少 ^0^
講反呢碟明太子2 食啦, 刺身咬落口較淋身, 好似食緊魚春咁, 我初時仲怕會好腥, 原來明太子係完全無腥味架, 餐廳將明太子特別製作過, 咸咸地又有少少辣, 我覺得加少少檸檬汁, 味道會更為突出。
我個人就比較鐘意食燒明太子, 燒到外皮少少脆身, 入面一粒粒軟淋淋的明太子, 口感好特別, 燒明太子較刺身咸少少, 所以我覺得配白飯食一流, 真係好好味。
食完頭先個刺身先知原來明太子係咁好食, 真係好驚喜, 再來明太子蛋卷, 好似日本玉子燒, 但入面加入左明太子, 蛋卷加上蔥花蛋味更香, 配埋少少咸味的明太子, 我足足送左半碗白飯來一齊食, 好正啊 ^^
 一夾開塊蛋卷, 明太子爆出, 證明絕對足料, 非常精彩!!
 送飯又點止一份蛋卷, 仲有香蔥明太子鐵板豚肉, 豚肉肉質鮮嫩, 咬落己經好多肉汁, 配上明太子令味道更加濃郁。
餐牌上食物價錢中等, 差不多每樣食物都係幾十蚊左右, 因為朋友收工收得夜, 10PM後仲有個超抵套餐定食可以選, 每份定食必有白飯, 湯 及日式蒸蛋, 另外可以任選3款食物都係 $120, 我地揀左明太子三文魚刺身, 好新鮮, 三文子好肥美, 明太子配三文魚原來咁夾, 好開胃好好味!! 另外明太子撈冷稻庭烏東, 係真正的日本幼身稻庭烏東, 好滑好有口感, 同埋明太子燒雞亦都好入味, 一隻切開2條, 係比較容易食不過得3條份量就少左DD。
餐廳仲有好多明太子食物同配料原來可以買走回家慢慢試, 我見唔係咁貴, 都忍唔住買左2包小食回家比老公試試。總括今次明太子料理真係令我非常驚喜, 原來明太子可以有咁多食法, 仲要咁好味, 真係要多謝朋友帶我來, 下次食日本料理唔洗只係唸起食刺身壽司, 原來明太子料理都可以咁精彩, 下次要再來試下其他明太子食物先 ^^

www.facebook.com/1437ritaandhim
歡迎邀稿或產品試用,電郵聯絡: ppqq1437@yahoo.com.hk 

沒有留言:

張貼留言