倆夫妻要維繫感情, 有時真係要藉著一D紀念日, 用個借口出街拍拖食餐好, 平時大家都忙, 每天放工回家傾計可能不到10分鐘, 所以慢慢嘆一餐鐵板燒, 大家用2-3個鐘慢慢傾下計食下野, 其實要好好維繫感情其實可以好簡單。朋友介紹下去左尖沙咀呢間心鉄板燒, 一入到餐廳見到有人食呢個火炙燒蠔, 廚師亦強烈推介話今日D蠔特別新鮮, 我地第一次連餐牌都未睇就落左ORDER, 果然無令到我地失望, 除左賣相吸引要快手影相PO上網呃LIKE外, 味道食落好鮮甜, 好重蠔味及帶點少咸海水味, 非常美味, 值得推介。
其實一坐低待應會幫我著圍裙, 以免被油彈落件衫度, 但男人要著圍裙初時有少少不情願~ 不過佢越不情願我越覺得好笑, 瘋狂影下佢個無奈樣~(互相取笑當情趣吧~哈哈哈)
因為我地都係第一次試呢間餐廳, 所以叫2人晚餐就可以乜都試齊啦。
先來個刺身沙律, 新鮮沙律菜再加北海度帶子及吞拿魚, 配埋帶有少少酸的沙律汁, 的確非常開胃。
餐湯有3款選擇, 我們選了龍蝦湯, 廚師先在鐵板將龍蝦炒熟, 再加上己預熱的龍蝦湯。
湯底非常濃郁，入口好滑, 龍蝦好彈牙, 好鮮甜。
前菜再來一個意大利多士, 廚師在鐵板上整到塊多士剛好外脆內軟, 配上冷冷的蕃茄粒及吞拿魚蓉, 咬落口感覺有凍有熱, 有脆有軟, 口感非常可口、味道好復雜但十分開胃美味。
牛油焗銀鱈魚原本以為好簡單, 原來廚師將新鮮銀鱈魚慢慢用牛油燒至7成熟, 再放入鐏鐵鍋內慢慢焗至全熟。
一打開蓋牛油味樸鼻, 銀鱈魚外皮有少少脆身, 內裡內質好軟滑, 好味。
鐵板燒南非鮑魚感覺高級，要鮑魚好味一定唔可以OVER COOK, 廚師經驗豐富, 鮑魚咬落有口感, 好鮮甜, 配埋柚子海苔泡泡味道更為特別。
鐵板燒食得多都會有少少溜, 所以一定要食返D蔬菜中和返, 燒茄子、東菇、南瓜, 擺成一個笑哈哈, 廚師好有趣呢 ^^
主菜陸續登場啦~ 厚燒牛舌, 材料新鮮其實唔洗太多調味己經好香, 好有口感, 而且不肥膩。
接著就係牛肩甲，肉質較軟身，好重牛香味，一啖一口剛剛好。
最後就係牛柳啦~厚身切成一大粒, 口感非常豐富, 油脂分佈較多, 食落有入口即溶既感覺, 好好味好滿足啊!!!
己經飽左9成了, 但見到廚師係鐵板上炒菜同炒飯, 一邊睇一邊又好想繼續食, 所以話鐵板燒其實係一種藝術, 明明己經好飽但見到出來的作品是如此完美, 又好難唔將佢放埋落口。
甜品時間當然係女生最期待啦, 鐵板銅鑼燒配上紅豆蓉, 廚師再浪漫地加上一個心心, 老夫老妻拍拖食飯都可以是一種浪漫。
特別想講餐廳雪糕除左有基本芝麻及綠茶味, 較為特別有袖子同海鹽味, 我試左袖子雪笆, 酸酸甜甜幫助消化, 味道十分清新, 今晚非常滿足, 嘻~下一個紀念日要再來呢度食餐好 ^^ ((其實我同老公隔2個月就有一次紀念日~ 雖然有人會覺得好無聊, 但其實都係一個借口姐...襯食餐飯來維繫大家感情, 有時仔女係重要, 但雙夫婦亦都唔可以忽略同另一半的相處時間, 嘻, 即係我2個月後好快又會再來啦...哈哈哈 Yeah^^ ))
 |
歡迎邀稿或其他產品試用，電郵聯絡: ppqq1437@yahoo.com.hk
其他BLOG分享包括:
沒有留言:
張貼留言