2017年12月4日 星期一

放棄神校...一個超艱難的決擇

上年小周董同好多小朋友一樣要INTERVIEW K1,而我同好多家長一樣都為小朋友做足準備(例如: 影好面試相、準備好戰衣等。) 
報邊間幼稚園大家都有好多不同原因 (例如: 近屋企、傳統名校、一條龍學校等等),因為小周董本身讀緊屋企附近一間N班,佢讀得好開心,所以我無同佢大包圍報好多間學校INTERVIEW。
我認我都係追名牌心態,幫小周董報左5間出面頭幾位出名幼稚園,博一博運氣心態,得左係一個BONUS,唔得都當見識過,繼續讀返原本N個間幼稚園。
講真K1面試遊戲玩完,我都唔係好識分佢表現好定唔好,5間幼稚園面試中,小周董有做足老師指令,對住老師有問有答,但我眼見其實好多小朋友表現都一樣出色,以咁細個小朋友在無乜時間WARM UP可以答到老師問題,我自己己經覺得佢地好叻仔/好叻女。
所以其實我覺得有時面試結果,唔多唔少都靠少少運氣、老師眼緣、同埋小朋友個刻心情狀態,結果有幾多學校收,唔代表小朋友能力有幾叻,小朋友的能力什至未來又點可以因為一場面試來定奪呢,有時家長太緊張可能有反效果都唔定,所以每次面試我地都同小周董講係去同其他小朋友玩,可能咁佢每次都放輕鬆開開心心咁去"玩"。
"玩"左5次後,上年呢時候,差不多12月左右,開始陸續收到學校的結果,小周董算好彩,IN 5間幼稚園有3間收左,但其中一間係我心儀左好耐的......神校啊!!!!!!!! 當我收到取錄信個刻,我真係開心+驚喜到下巴跌左落地下!!!!
開心的事原來會一浪接一浪,到1月我們再收到另一間幼稚園的取綠信,呢間係爸爸最心儀的學校,今次真係倆公婆打交都唸唔掂點算,我成世人都無乜試過呢D快樂的決擇,但原來一樣會令人好苦惱。
2間學校 (K學校 及 S學校),我同爸爸有不同意見:
我呢D凡夫俗子明顯係比較心儀K學校,佢出名有一套獨有教學模式,令到小朋友愛上學習,雖然好多人話 K學校比較谷、多功課、但好多畢業學生學術方面都十分出色,考小學會較有優勢,但就較少親子活動,玩樂時間比較少。
而S學校偏向算係一間HAPPY SCHOOL,小班教學,學習及玩樂時間較為平均,有適當親子活動,爸爸最鐘意係學校同我地屋企有共同宗教背景,除左學習學術外,爸爸想小周董學到信、望、愛等個人修養,所以我老公偏愛S學校。
我地考慮期間,發現其實香港地真係好多爸媽都會安排小朋友學習不同技能,例如唱歌跳舞、琴棋書畫.......等等等等。我無為小周董有呢個安排,佢聽到音樂會聞歌起舞,見到樂器會好奇彈幾下,但我始終覺得咁細的小朋友應該興趣行先,日常生活父母多D陪佢玩下,其實一樣都學到野架 ^^''
我同爸爸唔想太早催谷小周董學習,反而想佢玩多D,不過好奇怪小周董自己對文字好有興趣,好鐘意睇書,好多朋友問我點解,我唸可能因為小周董出世後我家基本上係無開過電視,電子產品我地都好少比小周董接觸,反而由細到大我地想培養小周董閱讀習慣,每天一定抽時間同佢睇書,所以小周董真心喜歡閱讀,就算去到公園佢只要見到有英文字,佢都會對住D字母讀或扮寫。^.^''
我地作為父母陪佢一齊探索,陪佢做佢有興趣的事,簡簡單單陪佢睇本圖書,小朋友從中可以學習之餘,亦會感受到我地的陪伴、我地的愛。所以每星期去一次圖書館係小周董最期待的活動,可能有人認為咁好簡單,但小朋友開心其實就係好簡單。
經過多次家庭會議,我地決定放棄神校,對我來講雖然係一個好艱難的決定,但我地睇返小周董性格,我覺得佢現階段真心喜歡學習喜歡發問,如果強迫佢做某D事反而會有反效果,我同爸爸雖然對2間學校都有不同意見,有好有唔好,但我地對小周董出發點係一致,就係想佢有一快樂童年,想佢內心係一個有愛的小朋友,學術上的知識日後大把機會學到,但小朋友性格或者修飬要從小學習及培養。
用左3個月時間作考慮,但要寄出呢封退學信時,內心都要鼓起好大勇氣,放棄神校身邊總有好多朋友大叫可惜,不過經過3個月時間,我地特別留恴小周董性格,希望搵一間真正適合佢的幼稚園培養佢學習興趣,神校與否都係坊間講出來,未必適合所有小朋友,亦未必全部小朋友入到神校等如入到一間好小學,所以最緊要觀察自己小朋友的性格及才能,才作出呢個艱難的決擇。
現在小周董上左K1差不多3個月了,適應得好好同埋日日回家都笑咪咪話好鐘意返學,呢個選擇最終係錯與對己經不重要,因為我地無忘記對小朋友最初的要求只係想佢開心健康成長,佢現在開心己經好足夠了。^^
 www.facebook.com/1437ritaandhim
歡迎大家給予意見,如有任何邀稿或產品試用,請電郵聯絡: ppqq1437@yahoo.com.hk,我的其他15個BLOG分享包括: InstagramBlogspotBeautyExchangeOh爸媽、24partent專家博客Weshareshe.comtheZtyleELLE.comstyle-tips U BlogiTrialEsdlife靚太clubQOOZAMybb.com,  ClassesWePlay星級bloggerMamibuy駐站部落客OpenRice(級別5)

沒有留言:

張貼留言