有2個小朋友真係太忙，好多朋友都有問過我陪月的事，但一直未有時間寫blog分享，第1胎生小周董時我無請陪月，以為有工人同埋有媽媽幫手可以攪得掂，點知.....攪得掂BB但我因為缺乏休息，同埋媽媽原來唔識補身，我又以為餵人奶唔可以食補品，結果錯過了黃金補身時間，所以第一胎後我身體的確差左好多，到第二胎發現有細佬後...我連婦科醫生都未搵，就己經周圍問朋友介紹陪月。
朋友介紹下我見過大約6-7個陪月，見工時D問題大約都係問呢D
1）買鎹時間計不計內工時內
2）識唔識按乳線（塞胸）
3）奶樽BB衫是不是負責洗
4）代不代整炒米茶（在醫院喝的）
5）大補放在第幾天開始
6）問下佢泵出來冰奶存放期
7）如果touch wood要取消可否退回大訂
8）有無舊僱主reference
首先請唔請陪月當然睇下自己是否能夠負擔，陪月每星期工作6天，每天工作8小時，每月工作26天，星期一至星期六（逢星期日休息）如要加時就要補錢，如遇上黑雨及8號風球或以上，將會在工作最尾補回一天。人工方面當然各有不同，如果有經驗的陪月每月應該已過$20000，所謂金牌當然會更高呢。
而揀左一個陪月(ANNIE)當然都有經驗，雖然佢唔算咩金牌阿姑，但講野態度有禮，個D所謂金牌陪月有時大大聲要你聽晒佢話，我心唸: 我生完己經好攰，我屋企有個阿媽，仲要多一個阿媽煩我，所以我實在唔願意請個D聲大大的陪月，費事有機會令到我燥底爆發， 話晒對住陪月至少一個月，我覺得最緊要揀一個相處得舒服。ANNIE會照顧我3餐，當中以清淡為主，餸菜內亦會加左D葯材來補身，味道唔會太濃但亦唔會淡而無味。
除左日常湯水幫我補身同谷奶，最重要係我餵人奶初期乳塞得好嚴重，佢每次來都會幫我推乳亦教我買椰菜包住乳房舒緩塞奶情況。最後我成功迫爆左雪櫃，人奶多到要用來比BB沖涼 ^^
好多媽媽唔捨得請陪月，我自己都一樣，但第一胎試過無請，同今胎請左感覺原來真係爭好遠，BB每3個鐘要食一次奶，我地半夜仲要餵奶，朝早陪月一來我就爭取時間訓覺，陪月會全面幫忙煮飯煲湯，同BB餵奶沖涼等工作。
下午茶陪月多數會整D滋補糖水比我，連小周董都要搶住飲。
仲有仲有...我生完先來腳腫，腫到差點鞋都著唔到
陪月會每日替我按摩去腫，雖然時間唔係好長，每日大約半小時按左大約5日就消左腫了，好舒服雖然我好想佢可以幫我按耐D...哈哈! 不過我梗係無出聲，按摩都係出去搵按摩師啦!! 嘻嘻
我用左陪月一個半月，最記得有一次我坐完月出街，ANNIE見有時間就整左餐超豐富大餐比我地一家，有老公至愛糯米飯，小周董至愛無骨釀雞亦......太正啦!!!
有時佢仲會自家整好多甜品比小周董，最後陪月要走最唔捨得ANNIE既就係小周董喇。
我都唔捨得架，因為有陪月我真係放心好多，細佬又食得又訓得，同埋每日訓多至少4個鐘，成個人真係精神好多，所以我真心同各位媽媽講，如果能力許可，生仔可以去政府，慳返D錢用來請陪月，對自己同對BB都會好D。
多左時間休息亦都多左時間同佢2兄弟相處，今次坐月的確舒服得多。
搵到一個好陪月唔多唔少都係要靠朋友，我算好彩搵到ANNIE幫到我，最重要係對BB同小周董都好好，就算己經做完左合約，到左新年佢竟然拎左D糕點比我地食，小周董食得不知幾開心，真心多謝佢。最後都係提醒大家，請陪月之前點都要見下面先，唔好純粹信朋友就OK，見面聽下佢的經驗，我覺得信自己感覺，同佢傾計舒服同埋要感覺佢老實都好重要。希望大家都生產順利，開開心心迎接未來的小寶貝 ^^
僱傭合約資料
聘請陪月員時與她們訂立僱傭合約
** 列印一式兩份正本，一份僱主保存，一份陪月員保存。
** 訂立僱傭合約時，大部份都需要付按金予陪月員，以作預期之用。
** 簽妥合約後，KEEP一份副本，以作存檔。
至於保險或開工利是等都可以自行同陪月相量，我請陪月經驗只有一個，呢度只係同大家開心SHARE我自己的經驗，絕非廣告及沒有任何回佣，大家如有查詢可去我的FB專頁PM我大家一齊開心交流。
 |
| www.facebook.com/1437ritaandhim |
歡迎大家給予意見，如有任何邀稿或產品試用，請電郵聯絡: ppqq1437@yahoo.com.hk，我的其他15個BLOG分享包括: Instagram, Blogspot, BeautyExchange, Oh爸媽、24partent專家博客, Weshare, she.com, theZtyle, ELLE.com, style-tips, U Blog, Esdlife靚太club, QOOZA, Mybb.com, ClassesWePlay星級blogger, Mamibuy駐站部落客, OpenRice(級別4)
